KALIBO, Aklan — Padayun nga nagapanawagan ro Philippine Red Cross (PRC) Aklan Chapter sa tanan nga mga aktibong blood donors ag mga healthy nga indibidwal nga boluntaryong magtau it dugo bangud sa kakueangan it suplay it dugo sa andang blood bank.
Raya ro ginpahayag ni Ms. Mary Joe Galleon, PRC Aklan chapter administrator.
Suno kana nga masyadong mataas ro porsiyento it mga nagakinahangean it dugo kaysa sa naga-donate rason nga may mga kahigayunan nga indi eon maserbisyuhan ro mga naga-request kara.
Dugang pa nga nalipay man sanda sa suporta it mga local government units, government agencies ag iba pang pribadong sektor sa pagpatigayon it PRC-Aklan chapter, agud nga mapabilin ro bastante nga supply it dugo sa andang pasilidad.
Apang mas naga-inabu suno kana ro mga nagakinahangean it dugo kada adlaw.
Pwede suno kana nga mag-agto sa mga ginapatigayon nga blood letting activities agud nga mag donar it dugo.
Suno pa kay Galleon nga owa eamang ginatawag nga baganihan ro mga blood donor.
Ro nagapangunang benepisyo kara hay ro kasayuran nga ro dugo nga gina donar hay maka-eowas it kabuhi it iba, masayuran ro blood type, ag ma-examine it doktor.
Ro blood letting activity suno kana hay ginasuportahan it Republic Act No. 7719 ukon ro National Blood Services Act of 1994, nga nagaduso sa boluntaryong pag-donate it dugo agud nga makaangkon it bastante ag eowas nga suplay it dugo ag agud nga i-regulate ro mga blood bank, nga nagatuyo nga mapaeapnaag ro kasayuran it publiko nga ro pag-donate it dugo hay sangka makatawong hilimuon.
