KALIBO, Aklan — Ginpaabot it Philippine Red Cross (PRC) Aklan chapter nga may mabahoe nga bulig ro pag-avail it SAFE CARD, sangka bag-o nanda nga programa nga pang-emergency protection.
Suno kay Ms. Mary Joe Galleon, PRC Aklan chapter administrator nga tuyo kara nga masiguro ro insigidang bulig para sa mga pamilya nga nagapangatubang sa malisod nga sitwasyon eabi eon sa mga indi makasarang nga magbayad eagi sa mga kritikal nga serbisyong medikal.
Sa idaeum suno kana it bag-ong SAFE CARD, may kinamatarung ro mga cardholder sa sangka libreng serbisyo it ambulansya, access sa medical assistance sa oras it emerhensiya nga owa it pagkabaeaka nga balibaran bangud sa kakueangan it kwarta.
Dugang pa kara nga makabaton man ro mga miyembro it sangka libreng bag it dugo ag iba pa.
Ginpamilit ni Galleon nga ro SAFE CARD hay bukon eamang it sangka gamit nga pang-proteksyon kundi sangka daean paagto sa serbisyong makatawo.
Sa oras it pagrehistro nga may bayad nga P1,200 kada dag-on, awtomatikong nagiging miyembro it Philippine Red Cross ro mga cardholder.
Sakop kara ro P300,000 nga accidental death, disablement, and dismemberment benefit, kamana man ro P300,000 nga coverage para sa unprovoked murder and assault.
Eakip man kara ro P10,000 nga accident-related medical reimbursement; P5,000 accident-related burial assistance; ag daily hospital allowance nga P200 sa sueod it 60 days.
Ginpaathag pa it PRC nga ro mga membership fee hay direktang ginagamit sa mga operasyon sa pagsabat sa emerhensiya, serbisyong pang-dugo, rescue teams, ag iba pang mga inisyatibo nga naga-eowas it kabuhi .
