KALIBO, Aklan—Naeksperyensyahan ro maeapnagong pagbaha sa pilang kabanwahanan sa bilog nga probinsya it Aklan bangud sa pagbuhos it mabaskog nga uean, adlaw it Sabado, Pebrero 7, 2026.
Uman nga napuhag ro mga una sa mga low lying areas partikular sa banwa it Banga, Malinao, Ibajay ag Makato bangud sa madasig nga pagsaka it tubi-baha sa andang mga lugar partikular ro mga maeapit sa kasapaan ag sa kasubaan.
Raya hay matapos nga nagbuhos ro mabaskog nga uean hasta mahapon rason nga ro iba hay nasueod it tubi-baha ro andang panimaeay ag maging ro pilang karsadahon hay nakaangkon it gutter deep hasta sa tuhod nga kataason it tubi-baha.
Sa banwa it Malinao, nahugos ro approach it tulay sa Brgy. Lilo-an nga nagakonekta sa Brgy. Tiglapas ag Brgy. San Roque rason nga temporaryong inde raya maagyan it mga motorista.
Kamana man sa Brgy. Osman hay nahugos man ro porsyon it tulay nga bukon man it passable sa mga byahero.
Sa makaron hay may mga lugar eon nga naghubas ro tubi-baha bangud sa pag-untat eon man it pagbuhos it mabaskog nga uean.
