KALIBO, Aklan — Padayun nga nakakulong sa detention facility it Kalibo Municipal Police Station ro 51-anyos nga freelance journalist nga si Carlo Asturias nga nauna eon nga gin-aresto, bandang alas-3 it hapon it Martes, Pebrero 24, 2025 angot sa ginapangatubang nga 5 counts it cyber-libel ukon RA 10175 nga mas kilaea man sa tawag nga Cybercrime Prevention Act nga ginpasaka ni dating Aklan 1st District Congressman Carlito Marquez matapos sigon nga owa pa nakapagpiyansa.
Sa interview it Bombo Radyo, ginpahayag ni Asturias nga nag-ugat ro kaso sa anang naging komentaryo sa sangka radio station ag naka-Facebook live ko Setyembre 2024 nga gina-alegar nga nagabaton it 10% nga kickback ukon SOP ro dating kongresista sa mga contractor it ginapatigayon nga flood control project sa anang nasakupan nga distrito.
Ginpahayag dugang nga halin sa dating P36,000 nga piyansa sa kada count hay ginpanabaan raya sa P10,000 kada count matapos nga magdihon it motion to reduce bail gamit ro anang ginsumite nga indigency certificate ukon pagiging pigado kara.
Suno kana nga ginpasugtan it korte ro anang mosyon ag ginpanabaan ro anang piyansa nga naga-abot tanan sa P50,000.
Gin-aresto imaw sa gahum it warrant of arrest sa andang baeay sa pabahay it National Housing Authority sa Brgy. Ochando, New Washington.
Boluntaryo sigon imaw nga nagsunod sa mga awtoridad bangud nga mabuhay eon nana nga ginapaabot ro pag-aresto kana.
