KALIBO, Aklan — Ginkalipay it sambilog sa mga naka-away ag kaeapitbaeay it dating media personality nga si Carlo Asturias ro pag-aresto kana it mga awtoridad, adlaw it Martes, Pebrero 24 angot sa kasong cyber libel nga ginpasaka kontra kana ni dating Aklan 1st District Congressman Carlito Marquez.
Suno kay Jerson alyas Jaya Meñoto, residente it pabahay sa Brgy. Jugas New Washington nga ginaeauman eon nana ro pagdakop kay Asturias bangud sa mga kasong ginpasaka kontra kana it mga tawong anang naagrabyado, ginloko ag gina-obrahan it mga istorya nga owa it kamatuoran ag baeasihan.
Nasaksihan sigon nana ro pag-aresto sa 51 anyos nga si Asturias.
Dugang pa nga raya hay nagapamatuod eamang it paghueag it legal nga proseso para mapasabat imaw sa mga saea nga anang nahimo sa anang isigkatawo.
Madumduman nga bandang alas-3 it hapon it Martes, Pebrero 24 hay gin aresto si Asturias sa gahum it warrant of arrest sa anang unit sa bahay it National Housing Authority angot sa ginapangatubang nga 5 counts it cyber-libel ukon RA 10175 nga mas kilaea man sa tawag nga Cybercrime Prevention Act nga ginpasaka ni dating Congressman Marquez.
