KALIBO, Aklan — Apektado eon man ro mga pampasaherong tricycle sa banwa it Kalibo bangud sa sunud-sunod nga pagtaas it presyo it produktong petrolyo nga nagresulta sa dugang gastos sa andang pagpamasada.
Sa pihak kara, ginpahayag ni Antonio Nama, KAPETODA President nga status quo ukon indi anay sanda magapasaka it pamasahe .
Dugang pa nga padayun man ro andang pagbiyahe apang may limitasyon eon bukon it kapareho dati nga sigidas ro andang paglibot agud nga maka-usoy it pasahero.
Sa makaron hay naga-usoy sanda it lugar nga matambayan ag nagahueat nga ro pasahero eon lang ro magapaeapit kanda.
Pahayag pa ni Nama nga nagatau man sanda it konsiderasyon sa mga commuters nga eubus nga maapektuhan kon magapatuman sanda it panibag-ong pagpataas it pamasahe .
Bangud sa nagatinaas nga presyo it langis, haeos katunga it andang kita ro naduea ag haeos sa gasolina eon lang naagto.
Nagaeaum man sanda nga mataw-an it fuel subsidy halin sa gobyerno ag iba pang bulig halin sa lokal nga gobyerno it kalibo .
