Nag-umpisa eon nga magbalik sa normal ro sitwasyon sa Qatar matapos nga magtawhay ro pagpang-atake it Iran sa nasambit nga nasyon.
Suno kay Bombo International News Correspondent Jocelyn Ratin sa nasambit nga nasyon nga pilang adlaw eon ro nagtaliwan nga owa it may nababatian nga mga eupok it bomba sa nagkaeain-eain nga parte it nasyon.
Sa makaron hay uman nga nagbalik sa dating on-site ukon pisikal nga pagsueod sa trabaho ro mga empleyado sa tanan nga ahensiya it gobyerno ag pribadong sektor matapos ro haeos tatlong domingo nga work from home set-up tuga it mga pagpang-atake.
Bangud kara, maayos eon ro daeagan it mga serbisyo ag operasyon sa nasyon, kaibahan ro transportasyon, negosyo, ag pang-adlaw-adlaw nga hilimuon it mga residente.
Nagbalik eon sigon sa opisina ro anang employer kasunod it opisyal nga desisyon nga ibalik ro normal nga operasyon.
Dugang pa nana nga nagapabilin nga haum ro nasyon sa anuman nga posibleng matabu ag may nakapahaum sanda nga “mga emergency plan.”
Ko Lunes, gin-anunsyo it gobyerno it Qatar nga igabalik eon nanda ro normal nga operasyon sa tanan nga taeatapan it gobyerno umpisa Marso 24.
Madumduman nga gin aprubahan it mga awtoridad ro remote work para sa tanan nga ahensiya it gobyerno ko nPebrero 28 bilang sabat sa mga pag-atake it US ag Israel kontra sa Iran, ag sa pagbaeos it Tehran sa Israel ag sa mga ginakabig nga mga base militar ag interes it US” sa rehiyon, kaibahan ro Qatar.
Sa pihak nga parte, ginsaysay nana nga amat-amat eon man nga naduea ro anang nabatyagan nga trauma tuga it nasaksihan nga pag-einupok it mga missiles kun sa siin haeos tatlong adlaw sigon imaw nga naka-eksperyensiya it bukon it maayos nga tueog .
Si Ratin hay tumandok it Brgy. Jugas New Washington ag first time overseas Filipino worker nga haeos siyam nga buean pa eamang sa Qatar .
