Ginkumpirma ni Ukraine President Volodymyr Zelensky nga nagkaistorya sanda ni Pope Leo XIV ko adlaw it Biyernes, Abril 3 kadungan it panibag-ong serye it pag-atake it Russia sa andang nasyon sa pihak pa it panawagan para sa Easter Ceasefire.
Sa sangka post sa X, ginpahayag ni Zelensky nga samtang nagakatabo ro andang pag-istorya, uman nga ginbomba it Russia ro Ukraine gamit ro ginatos nga “shahed” drones ag dose-dosenang missile nga tumama sa nagkaeain-eain nga syudad ag komunidad.
Dugang pa ni Zelensky, ro mga pag-atake hay tayuyon halin pa ko gabie it Huwebes ag umabot eon sa indi magnaba sa limang rehiyon ro mga pag-atake.
Uwa sigon it maskin sang oras nga katawhayan para sa andang pumueoyo.
Ginakabig raya bilang sabat it Russia sa proposisyon it Ukraine para sa sangka Easter ceasefire, apang imbes nga magpundo, kapin pang naglala ro opensiba.
Ginpunto man it Ukraine President nga inde dapat pagbaliwalaon ro makaraya nga sitwasyon ag nagpahayag it pagpasaeamat sa mga nasyon nga padayon nga nagakomentar ag nagakondena sa kinagamo.
Sa nasambit nga pag-istorya, gintalakay man ro nagapadayon nga negosasyon, kaibahan ro pakikipagbuligan sa Estados Unidos.
Nagpasaeamat man ro Ukraine sa bulig it Vatican, kapin eon sa pagbalik it mga ongang ginkidnap ag sa gintao nga humanitarian aid, partikular ko nagtaliwan nga tag-eamig.
Naistoryahan man ro sitwasyon sa Middle East ag Gulf Region.
Sa pagtatapos it andang pag-istorya, nagpaabot it pagdayaw si Ukrainian President sa Santo Papa ag sa tanan nga magaselebrar it Easter sa adlaw it Domiggo kadungan it pangamuyo para sa kalinungan.
Nagpahayag man it kahauman ro Ukraine nga batunon ro Santo Papa engkasong bumisita imaw sa Ukraine.
