Madineag-on nga nakuhit it sangka Civil Engineering graduate ro anang handum nga lisensya sa pagka enhinyero.
Suno kay Engr. Mark Arvin Jimenez, newly licensed civil engineer, uwa naging madali ro anang inagyan antes makuhit ro nasambit nga kadungganan.
Sa pag-eskwela paeang nana, maabong hangkat eon ro anang ginpangatubang, mapa-pisikal, emosyonal ag mental nga hangkat. Apang, bangud sa anang kahugod, tyaga ag salig sa Ginuo, nahimo nana rayang maeampasan.
Dugang pa nana, uwa eagi nag-sink in sa anang isip nga mapasar nana ro nasambit nga eksaminasyon, apang nag-tao man sigon imaw it kasiguraduhan sa anang ginikanan nga kaya nana nga mapasar raya.
Uwa man sigon imaw gin-tubuan it kueba sa mismong adlaw it eksaminasyon bangud sayod nana sa anang kaugalingon nga preparado imaw.
Sa makaron, plano man nana nga mag-buoe it Master Plumber examination sa paaeabuton nga mga binuean.
