Hugot nga nagpanawagan si Pope Leo XIV it kalinungan ag paghiliugyon sa tunga it nagalala nga mga gyera sa kalibutan partikular sa Middle East.
Sa sangka prayer vigil sa St. Peter’s Basilica, ginkondena it Santo Papa ro gyera ag ro mga nagpasimuno sigon it kinagamo nga mas ginapili ro pagpakita it gahom kaysa pabaskugon ro dayalogo.
Gin-engganyo nana ro mga lider it nasyon nga punduhon eon ro kinagamo ag sa baylo hay mag-istorya agud nga maangkon ro kalinungan.
Maskin nga uwa imaw it nagsambit it partikular nga nasyon ukon pangaean it lider, klaro ro anang panawagan kontra sa padayon nga kinagamo ag gin-engganyo ro mga pumueoyo nga magbuligan sa pagbilog it sangka komunidad nga nakabase sa pagpalangga, pag-intindi ag pagkaeasugot.
Madumduman nga si Pope Leo, hay kilaea bilang sangka moderatong lider ag tagatib-ong it paghiliusa.
