Madinaeag-on nga nakuhit it Colegio de San Juan de Letran ro kampyonato sa kakatapos eang nga National Collegiate Athletic Association (NCAA) season 101.
Sambilog sa mga myembro it nasambit nga koponan hay ro tumandok it Malinao nga si Lastlie Jade Isar.
Suno kana, grade 8 pa eamang imaw kat nag-umpisa imaw nga mag-hampang it volleyball kun sa siin nakitaan raya it kapasidad nga mapa-intra sa nasmabit nga koponan.
Naging malisod man sigon raya bangud nga tunga ro anang oras sa pagiging estudyante ag pagiging atleta, apang bangud sa kagustuhan nana ro nasambit nga hampang, ginpadayon nana raya.
Dugang pa nana, pasaeamat man imaw nga uwa imaw haeos it pressure bangud nga ginasuportahan imaw it anang pamilya sa anang gina-ubra.
Paathag pa nana nga bangud sa manami nga pagdumaea it andang coaching staffs, ag team work, napatigayon nanda nga uman nga makuhit ro handum nanda nga kampyonato nga ulihi nandang naangkon kato pang dag-ong 1998.
