Ginmanduan ni Agriculture Secretary Francisco Tiu Laurel Jr. ro Masagana Rice Industry Development Program (MRIDP) kaibahan ro Philippine Rice Research Institute ag iba pang unit nga hugut nga imonitor ro posibleng epekto it nagapaabot nga El Niño phenomenon sa sektor it lokal nga bugas.
Nakikipag-angot man ro Department of Agriculture (DA) sa National Irrigation Administration, nga makaron hay una eon sa idaeum it Office of the President, para sa tamang paggamit it alokasyon it tubi ag siguruhon nga haum nga magsuporta sa mga mangunguma ro irrigation systems sa tag-init.
Kadungan kara hay ginpabaskog it DA ro pagsuporta sa mga mangungumang Pinoy sa nagataas nga balor it farm inputs, partikular ro mga fertilizer bangud man sa tensyon sa Middle East nga nagpataas sa presyo it produktong petrolyo.
Suno kay Tiu Laurel nga ginmandu eon nana ro pagpahaum para sa “worst-case scenario” para mapahagan-hagan ro epekto it El Nino sa farm production, kita it mga mangunguma ag economic activity.
Suno sa Philippine Atmospheric, Geophysical and Astronomical Services Administration (PAGASA), may 92 percent probability para sa katamtaman hasta sa mabaskog nga El Nino sa Pilipinas base sa El Niño-Southern Oscillation (ENSO) outlook.
Sa iba pang global climate model hay nakikita ro posibleng “super” El Niño, nga magapanaba sa uean ag makaangkon it mabahoe nga epekto sa water sources sa agricultural areas.
