KALIBO, Aklan — Ginpapanaugan it mga pag-eabag ag multa ro tricycle driver nga naeakot sa viral nga road rage incident, kun sa siin, hasaeawig ag ginbayo kara ro sangka estudyanteng siklista bandang alas-5:57 it hapon it Martes, Mayo 5, 2026 sa Mabini St. Brgy. Poblacion, Kalibo.
Raya hay kasunod it andang pag-atubang sa opisina it Traffic and Transport Management Division, adlaw it Miyerkules, Mayo 6 .
Suno kay Kalibo SB member Matt Aaron Guzman, chairman it Committee on transportation nga ginpatawag ro nasambit nga tricycle driver matapos nga ireklamo it siklista.
Naging mabahoe nga ebidensiya suno kana ro CCTV sa lugar rason nga nakumpirma ro bayolasyon it driver.
Sa imbestigasyon it Kalibo Municipal Police Station, natabu ro insidente samtang nakapundo ro siklista ag nagahueat sa traffic light, kat gulping bungguan it tricycle driver sa likod .
Imbes nga magpangayo it pasaylo hay ginhana pa imaw nga paeagiwan it driver rason nga nagsinggit imaw agud nga mapukaw ro atensyon kara.
Bangud kara, gulping nagpanaog ro driver sa anang tricycle ag ginbayo ro siklista nga anang hasagang butang nga nag-angkon it slight injury sa anang tudlo.
Mag-eowas sa citation ticket bangud sa traffic violations, nagapangatubang man it reklamong physical injury ro driver sa Kalibo MPS.
Ginaboeobanta nga kapin sa ₱5,000 ro kabilugan nga multa nga ginpapanaog sa driver bangud sa mga bayolasyon nga ginaeakipan it illegal turning, reckless driving, ag violence.
Nakataeana pa nga pagadesisyunan it Land Transportation Office (LTO) ro nasambit nga insidente.
