KALIBO, Aklan — Uman nga nagpasa it panibag-ong resolusyon ro Aklan Provincial Board agud nga uman nga i-insister ro andang nauna nga panawagan nga nagakundina ag nagapamaeabag sa unsolicited proposal para sa Boracay Bridge.
Suno kay Board Member Apolenar Cleope nga dismayado sanda bangud nga hasta sa makaron hay owa pa gintau kanda it Department of Public Works and Highways (DPWH) ag Public-Private Partnership Center ro andang mga ginapangayo nga dokumentong may kaangtanan sa kontrobersyal nga proyekto.
Ginahinyu it provincial board ro mga dokumento angot sa proposal, bidding, ag negosasyon it proyekto matapos aprubahan it DPWH ro ₱7.78-bilyong Boracay Bridge nga magakonekta sa isla it Boracay ag Caticlan sa banwa it Malay.
Madumduman nga sangka resolusyon ro ginpasaka it SP nga nagakundina sa pagtau it kontrata sa San Miguel Holdings Corporation.
Raya hay sa pihak it hugut nga pagpamaeanag it lokal nga gobyerno, mga residente, ag nagkaeain-eain nga sektor sa Aklan.
Ginpamilit it opisyal nga owa it bastante nga public consultation at endorsement ro proyekto halin sa mga local government units it aklan ag malay nga kabaliskaran suno kana sa probisyon it Local Government Code.
Ginmitlang man it provincial board ro posibleng epekto it proyekto sa environment, pangabuhian it mga bangkero ag mga maintok nga negosyo, pati man sa identity it Boracay bilang world-class island destination.
,
