KALIBO, Aklan — Nagtililipon ro mga opisyal halin sa nagkaeain-eain nga ahensya it gobyerno ag mga lokal nga lider sa sangka high-level meeting nga ginpangunahan ni Senador Loren Legarda agud nga talakayon ro pagpabaskog it electrification ag digital connectivity sa probinsiya it Aklan ag Antique.
Suno kay Gabrielle Calizo Quimpo, dating Congresswoman it Aklan ag makaron hay Executive Director it Aklan ICT Council, kaibahan sa mga nagapangunang gintalakay sa pueong hay ro pagpamayad sa suplay it kuryente, pagpaeapad it internet access, ag pagbilog it mas matibay nga digital infrastructure agud nga masuportahan ro negosyo, edukasyon, turismo, ag mga online services sa probinsiya.
Ginpamilit kara nga importante ro masaligan nga kuryente ag madasig nga internet eabi eon sa mga maeayong komunidad ag tourism areas kapareho it Boracay, kun sa siin, importante ro dere-deretso nga koneksyon para sa ekonomiya ag trabaho.
Gintalakay man sigon sa pueong ro mga tikang agud nga mapadasig ro rural electrification projects ag mapaeapad pa ro serbisyo it mga electric cooperative sa Aklan.
Kan-o eamang hay ginpaeawig man it gobyerno ro franchise it Aklan Electric Cooperative (AKELCO) agud nga padayun kara nga mapamayad ro distribusyon it kuryente sa mga sakop kara nga lugar.
Ginpahayag pa ni Calizo-Quimpo nga importante nga dungan nga mapabaskog ro electrification ag digital connectivity agud nga mas mapadasig ro pag-umwad it ekonomiya, makahimo it mga trabaho, ag maka-engganyo it mas maabu nga investors sa Aklan ag bilog nga Western Visayas.
