Nagapati si Senator Raffy Tulfo nga may posibilidad nga daywang senador halin sa majority bloc ro magasaylo sa minority bangud sa gina-alegar nga owa pagpabor sa pilang mga nagakatabu makaron sa Senado.
Ginpahayag ni Tulfo nga nataeupangdan nana ro owa pagkakuntento it pilang miyembro it majority sa tunga it mga natabu nga tensyon ko kan-o eamang ag isyu sa sueos it mataas nga kapueungan.
Suno sa senador, may daywang miyembro it majority bloc nga medyu bukon it komportable sa mga nagakatabu base sa andang hueag ag batasan, maskin nga owa nana gintumod kun sin-u-sin-o ro mga raya.
Sa makaron, may 11 nga miyembro ro minority bloc samtang 12 man ro una sa majority bloc. Bukon it kaibahan sa numero it aktibong majority members si Senator Ronald dela Rosa, nga nagapabilin nga owa nagapakita sa publiko matapos magguwa ro arrest warrant kontra kana halin sa International Criminal Court (ICC).
Bangud kara, ginpahayag ni Tulfo nga masyado eon nga manipis ro majority ag posibleng magbag-o ro balanse it gahum sa Senado kun may mga senador nga magasaylo it kampo.
