Ginpamalibaran it Office of the Ombudsman nga may eamod pumulitika ro P573-milyong plunder ag graft cases nga ginpasaka kontra kay Senador Jinggoy Estrada, ag gin-insister nga ro nasambit nga isyu hay saeabton ag bukon it pulitika.
Nagpaguwa it pahayag si Assistant Ombudsman Mico Clavano matapos ro alegasyon ni Estrada nga gintanyagan sigon imaw nga aywan ro Senate majority bloc kabaylo it pagbasura sa anang mga kaso.
Ginpamilit ni Clavano nga indi dapat paghaluon ro isyu it saeabton ag pulitika.
Nakabase ro mga kaso kontra kay Estrada sa alegasyong nagbaton imaw it P573 milyong kickback halin sa mga flood control project it gobyerno. Ap-at pang indibidwal ro kaibahan sa mga ginpasaka nga kaso.
Bago ro pagpasaka it kaso kontra kay Estrada, nagpasaka eon man ro Ombudsman it magkaseparado nga kasong malversation ag graft kontra kanday dating Ako Bicol party-list congressman Zaldy Co, contractor Sarah Discaya, ag dating senador Ramon Bong Revilla Jr., kaibahan ro iba pang akusado angot sa gina alegar nga iregularidad sa nagkaeain-eain nga flood control projects sa nasyon.
