Sangka tumaeagsahon nga dedikasyon para sa ginakabig nana nga simbolo it pageaum ro ginpakita it Amerikanang si Aleshia Wiley matapos nana nga opisyal nga mabo-oe ro Guinness World Record title nga “largest collection of Wonder Woman memorabilia”. Ro tubong West Georgia hay nagapanag-iya it kabilugan nga 1,581 nga nagkaeain-eain nga Wonder Woman memorabilia.
Nag-umpisa ro pagkahilig ni Aleshia kay Wonder Woman ko early 2000s pinaagi sa pagtan-aw it Justice League animated series. Grabe ro anang pagkahilig kara sa gina angkon nga kabaskog ag kaaeam ni Wonder Woman, nga suno kana hay nagasirbing padumdum nga owa it indi masarangan nga obrahon ro mga kababayin-an.
Ro kauna-unahang item nga nagpa-umpisa it anang koleksiyon hay ro comic book nga Wonder Woman #1 (1987) nga ginsueat ni George Perez, nga nabakae nana sa sangka flea market sa Florida.
Sa makaron, ginaeakipan it masobra sa 1,000 nga magkaibang edisyon it komiks ro anang koleksiyon, mag-eowas pa sa mga Funko Pops, action figures, ag iba pang tumaeagsahon nga mga hampangan.
Ginakabig nana nga pinaka-espesyal ukon “holy grail” sa tanan ro sangka edisyon it komiks nga may autograph it comic book writer nga si Stan Lee ag aktres nga si Lynda Carter, ro sambilog sa naunang nagbuyot bilang Wonder Woman.
Sa pihak it puno nana nga mga estante, owa it plano si Aleshia nga ipapundo ro anang pagkolekta.
