Emosyonal nga ginpahayag ni NAPOCACIA President German Baltazar ro andang presnteng sitwasyon matapos nga gin-demolish ro andang panimaeay sa Brgy. Nalook, Kalibo.
Suno kana, uwa it hustisya ro natabo kanda bangud nga uwa it nagpatunga sa andang problema. Masakit sigon isipon nga uwa it ginakabig nga “tatay” it mga pumueuyo nga nag-patunga sa ginakabig nga ‘mga unga’ nanda nga ginabully eon sa ground.
Paathag nana nga mas kinahangean nanda it presensya ag pag-eksplikar it presenteng sitwasyon ag bukon it padaehan eamang sanda it truck ag hambaeon nga gindaehan sanda it pagkaon nga uwa man nanda ginabatuna bangud nga bukon it raya ro andang kinahangean. Dugang pa kara, nagpahayag man imaw it pagkadismaya sa mga tawo nga ro ginadum-ok nga saea sa pihak nga uwa sigon sanda nakaintindi it andang sitwasyon.
Pagklaro nana, may ginabuytan sandang leasehold, pamatuod nga may kasugtanang nagtuhaw sa tunga nanda it tag-iya it eugta.
Ginpunto man nana nga nauna eon nga may gin-tanyag kanda nga offer nga ginpaburan eon man sigon nanda ag uwa ginpataasan bangud nga uwa man sanda naila nga magpang-eapaw ro offer. Apang ro problema sigon hay uwa raya natao kanda, kun sa siin dapat hay hatao eon raya antes pa man ma-demolish ro andang panimaeay para sa andang pang-kapital sa andang bag-ong umpisa.
Bukon man sigon it klaro ro andang gina-sayluhan nga housing bangud nga uwa man sanda hapatun-an it timprano ag uwa pa raya ha turn-over kanda.
Padayon imaw nga nagapanawagan nga maresolba ro andang ginabitbit nga problema.
