Sangka Filipina nurse practitioner ro nagapangatubang makaron sa nagkaeain-eain nga federal charges sa Estados Unidos matapos akusahang utok it sangka maeapnagon nga healthcare fraud scheme nga ginasugid nga nakapangdaya sa Medicare ag TRICARE it haeos US$1 bilyon ukon ginaboeobanta nga P51.6 bilyon.
Ginkilaea ro suspek nga si Marizel Yukee, residente it Las Vegas, nga gin-isyuhan it warrant of arrest it United States District Court for the Southern District of Texas.
Ginkasuhan imaw it conspiracy to commit healthcare fraud ag wire fraud, healthcare fraud, conspiracy to pay and receive illegal kickbacks, ag money laundering.
Suno sa mga federal prosecutor, gina-alegar nga target it operasyon ro mga magueang ag pasyenteng may grabeng sakit pinaagi sa pagtau it owa nagakasinanto nga wound treatments, nga pagkatapos hay ginasukot sa mga government health programs.
Gina-angot si Yukee sa operasyon it ap-at nga wound-care clinics sa Texas, Nevada, California, ag Hawaii, kun sa siin ginasugid nga nagabayad it ilegal nga kickbacks kabaylo it patient referrals.
Base sa imbestigasyon, gina-peke man sigon ro medical records it mga pasyente ag nagasukot para sa mga serbisyong bukon man it kinahangean samtang nagabaton it milyon-milyong dolyar nga kickbacks.
Suno pa sa mga prosecutors, gingamit sigon ro mga nabo-oe nga kwarta sa luho ag mga maeahaeon nga property kaibahan ro Ferrari supercar nga nagabalor it masobra sa US$500,000, mga alahas kapareho it Bulgari necklace nga nagabalor it US$865,000, sangka baeay sa Hawaii nga ginaboeobanta nga US$1 million, ag sangka beach resort project sa Santa Ana, Cagayan sa Pilipinas nga naga-abot sa US$4.6 million.
