KALIBO, Aklan —Padayon pa ro imbestigasyon it mga kapulisan matapos nadiskubre ro sangka kalibre .38 nga revolver nga may kaibahan nga an-om nga bala sa bag it sangka Grade 10 student sa sangka eskwelahan sa Barotac Nuevo, Iloilo.
Suno sa Police Regional Office 6, madasig nga nakipag-angot ro pamunuan it eskwelahan sa Barotac Nuevo Municipal Police Station matapos makita ro armas.
Ginsurrender insigida ro baril sa mga pulis para sa nagakaigo nga dokumentasyon ag legal nga proseso.
Ro 15-anyos nga estudyante, nga ginakabig nga child in conflict with the law (CICL), hay ginpaidaeom sa child-sensitive intervention process ag ginturn-over sa Department of Social Welfare and Development (DSWD).
Samtang, gindayaw ni Acting Regional Director PBGEN Randulf T. Tuaño ro madasig nga aksyon it mga manugturo ag mga pulis.
Ginpamilit kara ro importansya it hugot nga koordinasyon sa tunga it Philippine National Police (PNP) ag Department of Education (DepEd) para mapabilin ro kaeowasan ag seguridad sa mga eskwelahan.
Nauna kara, mas pa nga ginhugtan ro seguridad sa mga eskwelahan sa Western Visayas, eakip ro inspeksyon it mga bag ag paggamit it metal detector, matapos ro natabong insidente it pagpamaril sa sueod it sangka eskwelahan sa Tacloban City. Via Office of the Regional Director PRO6
