Owa it foul play sa kamatayon it person deprived of liberty ukon PDL sa sueod it Aklan Integrated Rehabilitation and Security Unit, dating Aklan Rehabilitation Center sa Brgy. Nalook, Kalibo.
Raya ro ginpahayag ni retired P/Lt. Col. Ariel Nacar, provincial warden it AIRSU.
Bandang ala-1:48 it aga-aga it Martes, Hulyo 21 hay ginpahisayod sigon kana it anang naka-duty nga prison guard nga nasapwan nga nakabigti ro PDL nga si Delsol “Rey” Zunio Jr., sa sueod it comfort room it andang selda .
Nakita sigon raya it anang kaparehong preso nga si alyas Jun nga nakabigti sa kisame it CR gamit ro eubid nga nylon.
Nangawa pa sigon ro nakakita kon ham-an nga patay ro iwag sa andang CR ag sa anang pagsueod agud kunta nga maga-ihi hay hasunggaban nana ro nakabitay nga eawas ni Zunio.
Si Zunio hay may kasong Robbery with Homicide angot sa pagbaril ag pagpatay sa 23 anyos nga empleyado it J&T Express Philippines nga si Jan Andrei Bolido sa Barangay Dumga, Makato, ko April 27, 2024.
Mag-eowas kara, nagapangatubang pa imaw sa kasong pag-eabag sa Republic Act No. 9165 o Comprehensive Dangerous Drugs Act of 2002 ag reckless driving ag disobedience of an agent of authority.
Suno kay warden Nacar nga gintugyan nana sa Kalibo Municipal Police Station ro pagpatigayon it imbestigasyon agud nga maduea ro mga pagduda.
Dugang pa nga pagkatapos sigon nga magtambong sa anang hearing angot sa nasambit nga kaso, nataeupangdan it prison guard nga nag-escort kana nga medyu maeuya ag owa haeos nagahambae si Zunio.
Pagsueod sa andang selda, owa sigon raya nag-ilabas ag dumiretso sa anang eugban ag nagpabukot it haboe.
Nakita man sigon it anang mga ka-selda nga nagatangis ag naga-obra it sueat nga ko ulihi hay natukiban nga sangka suicide note.
Pagka-hapon sa andang cellphone time, may gintawagan sigon si Zunio, apang naging matag-od eang ro anang pakikipag-istorya ag nagbalik eagi sa sueod it selda nga owa ginhueat ro anang mga kaibahan.
Owa man sigon nana ginkaon ro anang ihapon.
Dead-on-arrival sa Aklan Provincial Hospital ro PDL nga residente it Brgy. Polo, Banga.
