Ginkumpirma ni Venezuelan National Assembly Chief Jorge Rodriguez nga nagsaka eon sa 6,125 nga katawo ro namatay sa kambal nga linog nga tumama sa nasyon ko Hunyo 24.
Ro pinakabag-ong datos hay ginpaguwa masobra sa sang buean eon ro nagtaliwan umpisa nga tumama ro magnitude 7.2 ag 7.5 nga linog nga nagtuga it pagkahugos it haeos 200 nga edipisyo nga kaabuan hay nailista sa pinaka-grabeng tinamaan nga coastal state it La Guaira.
Ro ulihing death toll nga nailista hay kapin sa 5,546 indibidwal samtang haeos 17,000 nga iba pa ro naninahan.
Padayun man ro pag-usoy it mga rescue team ag miyembro it pamilya sa mga biktima ag mahae sa kabuhi nga natabunan it mga nahugos nga edipisyo.
Base sa report it local media, ginpahayag ni La Guaira Governor Jose Alejandro Teran nga nagapabilin nga missing ro 1,400 nga katawo matapos tumama ro kalamidad.
Mag-eowas sa 190 nga mga edipisyo nga eubus nga naguba, gin-classify it mga otoridad ro masobra sa 6,400 istruktura bilang “high-risk” samtang ro masobra sa 9,800 nga iba pa hay ginakabig bilang “restricted housing” agud nga ipaandam ro peligro it mga raya para sa mga residente sa lugar.
Sa makaron, haeos 24,000 katawo sa La Guaira ag Caracas ro temporaryong naga-istar sa makeshift shelters kasunod it mga pag-uyog.
Ko nagtaliwan nga Biyernes, gin-aprubahan it mga mamalidha sa Venezuela ro sangka laye agud obrahon nga mas madali ro pag-renta it mga property. Tuyo kara nga mabuligan ro mga biktima it linog.
Ginahueat eon lang kara ro pirma ni Interim Leader Delcy Rodriguez agud eubusan nga maging laye.
