Amat-amat eon nga naha-hathat it prosekusyon ro mga ebidensya sa impeachment trial kontra kay VP Sara Duterte.
Raya ro naging pahayag ni dating Bayan Muna Party-list Representative Teddy Casiño.
Suno kana, sa pihak nga mas nagiging teknikal ro debate sa tunga it mga abogado, mas nagiging manami raya bangud nga mas maeubtan it publiko ro mga proseso.
Paathag ni Casiño, ro paggamit it confidential ag intelligence funds sa mga gaeastusong kapareho it bueong, groceries, lames ag pungkuan, hay uwa nagakaigo sa nasambit nga pondo.
Mageuwas kara, saea man sigon ro pamaagi it pagreport kun paalin raya gingastos, kaya mabahoe nga kwestyon raya.
Dugang pa kara nga maskin sigon ginakabig nga konpidensyal ro mga dokumento, kun umagi sa impeachment hearing, obligado nga buksan raya.
Ginpamilit man nana nga importanteng mapamatud-an it Office of the Vice President ro pagkatawo it mga ginasugid nga benepisyaryo it confidential funds ag mapaathag ro kakueang sa mga accomplishment report nga gintumod it Commission on Audit.
Pahayag dugang ni Casiño, importante ro pagiging patas it mga senador nga nagaserbeng impeachment judges. Dapat sigon nga naka-pokus eamang ro mga raya sa pag-usisa it ebidensiya ag likawan nga mag-tao it timprano nga konklusyon samtang nagapadayon ro pagbista.
