KALIBO, Aklan—Ginpamilit it sangka eksperto nga importante nga mataw-an it bastante nga pag giya ag atensyon ro mga pamatan-on, partikular sa tiempo it andang adolescent years, kun sa siin, naga-agi sanda sa hormonal changes ag amat-amat nga nagapahaum sa pagtuntong sa adulthood.
Raya hay sa tunga it natabu nga pagpamaril sa sangka pribadong eskwelahan sa Zamboanga City nga ginkamatay it daywang estudyante eakip ro shooter.
Suno kay Dr. Romeo Lorenzo, sangka psychiatrist ag London-trained, licensed mental health professional nga ginakabig nga kritikal nga chapter it kabuhi ro high school years bangud nga possible sigon nga maka eksperyensiya ro mga pamatan-on it boredom, depression, curiosity ag kagustuhan nga mag-experiment.
Sa raya sigon nga tiempo, mabahoe man ro impluwensiya it eskwelahan sa paghubog it andang pagbinatasan bangud nga maabung oras ro andang ginatinir sa eskwelahan mag-eowas sa papel it mga ginikanan.
Ginsuhestiyon man nana nga mapabaskog ro guidance services ag counseling sa mga eskwelahan, kamana man ro pagtau it mas mabahoe nga suporta sa campus ministry ag ro pagbalik it CAT cadet ukon Citizen Advancement Training cadet kamana man ro Good Manners and Right Conduct ukon GMRC sa curriculum agud nga mapabaskog ro values formation ag respeto sa awtoridad.
Dugang pa ni Dr. Lorenzo ro importansiya it responsableng pagiging ginikanan ag maayos nga komunikasyon sa sueod it baeay.
Suno kana nga posibleng mag-grabe ro pamatyagan it boredom ag pag-isaeahanon it mga pamatan-on kon kueang ro pakikipag-istorya sa pamilya ag magaresulta sa sobrang paggamit it cellphone.
Bangud kara, gin engganyo nana ro mga ginikanan nga magtaean it oras agud nga pamatian ag maka istorya ro andang mga unga.
Dapat man suno kana nga magbueuligan ro baeay ag eskwelahan agud nga masabat ro mga hangkat nga ginapangatubang it mga pamatan-on.
