KALIBO, Aklan—Nagapabilin nga kumpyansa si Vice President Sara Duterte nga makahaliw-as sa ginapangatubang nga reklamo angot sa illegal nga paggastos it anang confidential fund.
Raya hay kasunod it nagapadayon nga impeachment trial sa Senado kon sa siin posibleng inde mabuoe ro 16 votes para ma-impeach ro bise presidente agud nga mawad-an it gahom nga magpailihir sa maskin anu nga posisyon sa gobyerno sa maabot nga presidential election sa dag-on 2028.
Suno kay Atty. Harry Sucgang, sangka political analyst sa Aklan, uwa sigon nana nakikita makaron ro tyansa nga ma-impeach si VP Sara bangud nga klarong scripted ro pauman-uman nga sabat it hostile witness nga si SDO Gina Acosta.
Sa nagapadayon nga trial hay matsa ginadum-ok si Col. Dante Lachica nga mabahoe ro partisipasyon sa na-incash nga 125 milyon pesos confidential fund it Office of the Vice President.
Apang, ginpahayag dugang ni Atty. Sucgang nga nahimo ag natabo raya bangud sa may nagmando.
Uwa sigon sanda nag-ekspektar nga maimbestigahan ro milyones nga kwarta rason nga kon sin-o sin-o nga pangaean ukon alyases ro andang ginsueat sa acknowledgement receipt.
Sa makaron suno kana hay maabo pang factor ro ginakonsidera nga makaapekto sa nagapadayon nga pagpamati ag pagbista kay VP Duterte kon ma-acquit ukon ma-impeach antes matapos ro dag-on 2026.
