KALIBO, Aklan—Ginatan-aw makaron ni Atty. Harry Sucgang, sangka political analyst sa Aklan nga mapaiway eon man ro nakataeana kunta nga Barangay ag Sangguniang Kabataan Election sa Nobyembre 2 it presenteng dag-on.
Raya hay matapos nga gin-aprubahan it Senate panel ko adlaw it Lunes ro mga hagna nga nagatuyong ipaiway ro eleksyon ag himuon nga limang dag-on ro termino it mga barangay ag SK officials.
Suno kay Atty. Sucgang, uwa eon it nagapangahas nga mag-alsa kon uwa naila sa pamalakad it sangka opisyal bukon it kaparehas kato mga nagtaliwan nga dekada.
Nasayuran nga sa idaeom it Senate Bill No. 2387 ni Senator Francis ”Chiz” Escudero nga amyendahan ro Republic Act No. 12232 ag himuong limang dag-on halin sa presenteng ap-at nga dag-on ro termino it mga barangay ag SK officials.
Samtang, nagpanawagan si Commission on Elections (Comelec) Chairperson George Garcia nga makaangkon eon it klaro nga desisyon sa mas madaling panyempo kon madayon ukon mapaiway ro BSKE.
Suno kay Garcia, dapat masayuran ro magiging desisyon bago matapos ro Setyembre bangud sa nakataeana ro filing of candidacies halin Setyembre 28 hasta it Oktubre 5.
