Ginserbi eon it mga awtoridad ro warrant of arrest kontra kay dating House Speaker ag presenteng Leyte 1st District Rep. Martin Romualdez samtang imaw hay na-confine sa Cardinal Santos Medical Center, Lunes it gabie.
Kumpirmado halin kay Department of the Interior and Local Government (DILG) Secretary Jonvic Remulla nga opisyal eon nga ginakabig bilang person deprived of liberty (PDL) ro dating House leader matapos batunon ro warrant sa sueod it anang hospital room.
Insigida man nga ginpaidaeom si Romualdez sa mga kinahang-eanong booking procedure ag pagbasa it anang mga kinamatarong sa pagpanguna it mga awtoridad sa sueod mismo it pasilidad.
Suno sa pahayag it DILG, gindaea sa ospital ro mamalidha matapos makaeksperyensya it pagtaas it presyon it dugo, ag anxiety attack kat mabalitaan ro pagguwa it mando it Sandiganbayan.
Nakataeana mat-a nga magpabilin ro mga bantay halin sa pambansang pulisya sa guwa it anang kwarto ag sa palibot it ospital samtang padayon nga ginausisa it mga doktor ro kondisyon it anang eawas.
Uman nga ginpasiguro it gobyerno nga insigidang isaylo si Romualdez sa pasilidad it kulungan sa Quezon City Jail sa Payatas sa oras nga magtao it clearance ro mga medical expert nga pwede eon imaw nga magguwa.
