Mas mayad kunta nga personal nga nagtestigo si dating senador Antonio Trillanes IV sa impeachment court agud nga mataw-an it kahigayunan ro parte it depensa nga usisaon ag kwestiyunon ro anang mga pahayag.
Raya ro ginpabutyag ni political analyst Atty. Axel Gonzales.
Suno kana nga indi dapat nga “atras-abante” ro sangka testigo sa nasambit nga pagbista, eabi pa ag may proseso sa impeachment court para mausisa ro mga ebidensiya ag mapangutana it depensa ro testigo.
Madumduman nga ginbo-oe si Trillanes sa witness list it House prosecution matapos nana nga hinyu-on nga bawi-on ro anang pangaean.
Makabig sigon nga ro pag-atras ni Trillanes ag sa baylo hay nagpatigayon eon lang it press conference hay medyu paglikaw sa posibilidad nga makasuhan it perjury ukon false testimony engkaso nga makaangkon it problema ro anang testimonya.
Samtang, dugang pa kara nga ro mga pahayag ni Trillanes sa press conference hay indi awtomatikong makabig nga ebidensiya it impeachment court.
Suno pa kay Gonzales nga sa pagkamatuod hay mas maisog pa si Davao City Mayor Sebastian “Baste” Duterte kumpara kay Trillanes bangud nga nag-atubang ag nagtau raya it testimonya sa impeachment court.
