Pagabuligan it Department of Science and Technology (DOST) ro piña weaving industry sa Aklan, kaibahan ro pagpaumwad it silk ag cotton nga pwedeng i-merge ukon ihalo sa piña agud mapa-eapad ro produkto ag merkado it industriya.
Suno kay DOST Sec. Renato Solidum, importanteng mapaumwad ro mga produktong himo sa piña agud nga maging mas masarangan sa boesa ag mas maabu ro makapanipueos kadungan it pagpataas it produksyon ag kita it mga lokal nga weaver ag negosyante.
Kaibahan sigon raya sa andang plano sa gintaeana nga kapin sa ₱30.9 bilyon nga ginaproponer nga pondo it DOST sa idaeum it 2027 National Expenditure Program (NEP).
Samtang, ginpahayag ni Solidum nga pwede pa raya nga mabag-o ukon madugangan samtang ginapatigayon ro deliberasyon sa Kongreso.
Kaibahan sa mabahoe nga alokasyon it pondo hay ro ₱8.01 bilyon para sa Grants-In-Aid Program nga magasuporta sa research and development, inobasyon ag lokal nga industriya, samtang ₱2.28 bilyon man ro nakataeana para sa pitong research institutes it DOST.
Sa pihak nga parte, ginpasaka sa ₱8.67 bilyon ro pondo para sa DOST scholarship programs, nga ginaeauman nga mapuslan it 67,504 scholar sa bilog nga nasyon.
Sa nasambit nga pondo, ₱7.55 bilyon ro maagto sa DOST-Science Education Institute , samtang ₱1.12 bilyon man ro igatigana sa Philippine Science High School System para sa pagtindog it dugang nga mga campus.
