Ginatantyang kapin sa 25,237 agrarian reform beneficiaries ukon ARBs sa Western Visayas ro target nga makapanipueos sa pagpanao it indibidwal nga titueo sa eugta makaron nga 2026 sa idaeom it Support to Parcelization of Lands for Individual Titling ukon Project SPLIT it Department of Agrarian Reform (DAR).
Sakop it programa ro kapin sa 40,000 ektarya it eugta nga presenteng una sa idaeom it 2,746 collective Certificates of Land Ownership Award ukon CCLOAs.
Tuyo kara nga tungaon ro mga kolektibong titueo agud mataw-an ro mga kwalipikadong mangunguma it magka-separado ag mas sigurado nga legal nga pagpanag-iya sa mga eugta nga andang tamnan.
Sa kabilugang target, pinakamabahoe ro parte it Iloilo nga may 14,199 ektarya, kasunod ro Antique nga may 13,394 ektarya, Capiz nga may 6,951 ektarya, Aklan nga may 3,337 ektarya ag Guimaras nga may 2,117 ektarya.
Tuyo it DAR-Western Visayas nga makumpleto ro pagpanao it indibidwal nga titueo sa kabilugan nga 89,000 ektarya pag-abot it Disyembre 2028.
Mageuwas kara, target man it ahensya ro dugang nga 1,034 ektarya para sa regular land distribution ag 652 ektarya para sa land valuation.
Maga-tao man ro DAR it pag-ensayo, access sa credit ag microfinance, ag suporta sa mga agrarian reform organizations agud mapabaskog ro pangabuhian ag produksyon it mga benepisyaryong mangunguma.
