TANGALAN, Aklan — Nakapiyansa ro 45-anyos nga babaye nga gin-aresto matapos nga gina-alegar nga gumamit it pekeng ₱1,000 bill sa pagbakae it taeong ag simuyaw sa public market it Barangay Poblacion, Tangalan, ko Oktubre 15, 2026.
Kapin sa ₱3,000 ro piyansa sa kasong pageabag sa Article 168 it Revised Penal Code ukon illegal possession and use of false treasury or bank notes.
Suno kay PMAJ Jason Mausig, hepe it Tangalan Municipal Police Station, mismong taga central office it Bangko Sentral ng Pilipinas ro nag-agto sa andang estasyon agud magpatigayon it imbestigasyon ag pag-usisa sa peke nga kwarta.
Matapos makumpirma nga peke ro mga nakumpiska nga kwarta hay nagpaguwa it certification ro BSP para sa pagpasaka it nasambit nga kaso.
Madumduman nga nataeupangdan it tindera nga peke ro kwartang ginbayad it suspek sa pagbakae it taeong nga nagabalor it ₱105 ag simuyaw nga ₱10. Narekober man sa bag it babaye ro mga ginadudahan nga pekeng ₱500 ag ₱100 bill.
Dugang pa ni Mausig, may una man nga fish vendor nga nabiktima sigon it kaparehong modus, apang owa eon nagpasaka it reklamo.
Owa man nadakpan ro eaeaking nagamaneho it motorsiklo nga gintumod it suspek bilang anang live-in partner. Owa man it iba pang nailistang dating kaso ro babaye.
Nagpadumdum imaw sa mga negosyante nga maging mapagbantay sa pagbaton it kwarta, eabi eon sa mga oras nga maabu ro nagakabakae ag maggamit it mga aparatong makasarang nga magtumod kon peke ro kwarta.
