Nagpaabot it concern ro lokal nga gobyerno it Kalibo sa Smart Communication.
Suno kay Carla Suñer, executive assistant of the Mayor, sa pinaaagi it pagpadaea it sueat ni Kalibo Mayor Juris Sucro sa nasambit nga inkorporasyon, ginpaabot ro pagkabaeaka angot sa pagkaduea it signal kada may maeapnagon nga power interruption.
Bilang sangka capital town sigo it probinsya it Aklan, importante ro pag-angkon it internet connection para sa pakikipag-komunikar it mga negosyante, ag eabi eon gid para sa emerhensiya.
Eakip sa nasambit nga sueat ro pag-kutana kun may plano ro Smart nga mas pang-pabaskugon ag pamayaron ro andang serbisyo kapin eon kada mag-angkon it power interruption.
Sa makaron, uwa pa it nababaton nga reply ro local nga gobyerno.
Sa pihak nga bahin, ginpaathag man nana ro mga nakaplano nga aktibidad para sa pag-selebrar it foundation day it banwa it Kalibo ag pati eon man sa papatigayon it opening salvo.
Suno kana, pagahiwaton ro Kalibo Foundation Day sa agahon it Nobyembre 3 sa Kalibo Pastrana park covered court.
Kadungan kara ro pagpatigayon it Opening salvo kun sa siin maga-angkon it sad-sad sa hapon ag pati eon man ro opisyal nga presentasyon it mga kandidata it Binbini nga Kalibo Atiatihan 2027.
Dugang pa kara, may mga gin-imbitahan man nga mga bisita para sa nasambit nga mga programa.
