Ginkuwestiyon it Commission on Audit (COA) ro Department of Social Welfare and Development (DSWD) angot sa gina-alegar nga dobleng benepisyo ag sobrang ayuda nga ginpanupod sa idaeum it Assistance to Individuals in Crisis Situations (AICS) ko 2025.
Base sa audit findings, ginaboeobanta nga ₱397.5 milyon ro ginkuwestiyong ayuda, kaibahan ro mga benepisyong eampas sa nakabutang sa records ag mga kasong ginasugid nga dobleng pagbaton it bulig.
Ginsita man it COA ro ayuda sa pilang benepisyaryong nakabaton eon it suporta halin sa ayuda para sa Kapos ang Kita Program (AKAP), kamana man ro ₱14.41 milyong bulig nga ginpanupod sa masobra sa 20,000 nga pamilyang nagtapos eon sa Pantawid Pamilyang Pilipino Program (4Ps).
Depensa ni Social Welfare Secretary Rex Gatchalian, owa nagakahueugan nga may naduea nga pondo ukon “ghost beneficiaries” ro mga natukiban it COA.
Pwede man sigon nga makabaton it magkaibang klase it ayuda ro sangka benepisyaryo depende sa pagkinahangean ag sandig sa mga sueundanan it programa.
Gin-aku man ni Gatchalian nga may mga kahigayunan nga owa eubusan nga nausisa ro mga dokumento it aplikante, kaibahan ro pilang pekeng medical certificate nga natumod sa audit.
