KALIBOI, Aklan — Ginproponer ni Sangguniang Bayan member Raymar Rebaldo ro pagtau it ₱20,000 nga padya sa sin-o man nga makatau it impormasyong magaresulta sa pag-usoy ag pagbalik it naduea nga iskultura it tribal leader nga may buyot nga imahe ni Señor Santo Niño, patron saint it Kalibo.
Gindihon ni Rebaldo ro resolusyon sa ika-68 nga regular session it Sangguniang Bayan ko Oktubre 20, 2026, nga nagahinyu kay Mayor Juris Sucro nga aprubahan ro nasambit nga padya.
Nakadepende sigon sa alkalde ro pag desisyon ag posibleng sa personal nga pondo nana pagaboe-on ro nasambit nga kantidad .
Target sigon nanda nga makita ro estatwa antes ro opening salvo it Kalibo Ati-Atihan Festival sa Nobyembre 3.
Madumduman nga dating nakabutang ro iskultura sa Aloha landmark sa Kalibo nga ginbak-eas ko 2017.
Gindugang raya ko 2008 bilang kaparte it redevelopment it Aloha structure matapos mahalitan it Bagyong Frank, ag naging kaparte eon it kultura ag senyales sa pagsueod sa Poblacion Kalibo .
Sa pihak it mga naunang tikang it konseho para sa pag-amlig ag uman nga pagkabit kara hay nagapabilin nga bukon it klaru ro ginakahimtangan makaron it orihinal nga iskultura.
Apang may nakasugid sigon kana nga naispatan ro iskultura sa sangka lugar sa sangka banwa sa Aklan nga may kaugalingon man nga bersyon it selebrasyon it Ati-Atihan Festival.
May kahigayunan suno kana dati nga ginpa-usoy nana sa dump site ro estatwa base sa sugid it engineering department it LGU-Kalibo, apang owa raya nakita .
