KALIBO, Aklan — Patay eon kat madiskubre ro nakabigting eawas it 18-anyos nga accountancy student it sambilog sa andang panday sa sueod it andang under construction nga baeay sa Purok 5, C. Laserna St., Kalibo, Aklan.
Nakilaea ro biktimang si Danice Rose Roldan Custodio, 1st year student sa sangka eskwelahan sa Kalibo ag residente it nasambit nga lugar.
Base sa report, maga-umpisa eon kunta nga magtrabaho ro sambilog sa andang panday kat makita ro nakabigting eawas it biktima sa beam it ginahimo nga edipisyo gamit ro sangka eubid nga ginagamit nga bueuearan.
Insigidang ginpaeos sa pagkabigti ro daeaga, apang kat maipapanaog hay owa eon raya nagaginhawa.
Nasayuran nga ulihing nakitang buhi ro biktima kabi-i nga medyu owa man it problema base sa panaysayon it andang labandera.
Nagapadayun pa ro imbestigasyon it Kalibo Police Station sa kun ano ro rason it nasambit nga insidente.
