KALIBO, Aklan — Gin-anunsyo it Department of Tourism (DoT-6) nga naga-abot eon sa 337 ro accredited establishments sa Isla it Boracay.
Raya hay matapos ro padayun nga pagbuhos it mga domestic tourists sa isla.
Ginapahauman eon man it lokal nga gobyerno it Malay ag mga negosyante ro uman nga pagbalik it international chartered direct flights makaron nga Hunyo 17 halin sa Korea.
Ro 337 establisimento nga nataw-an it accreditation hay ginaeakipan it hotels, resorts ag iba pang negosyo nga nagatau it accommodation services.
Nauna eon nga nagpadumdum ro DOT-6 sa mga turista nga sa mga accredited hotels ag resorts eamang magcheck-in bangud ro mga raya eamang ro pasado sa health and safety protocols.
Nasayuran nga naga-abot sa record-high nga 193,298 ro domestic tourist arrivals ko Mayo ukon haeos 96% it kabilugan nga 201,368 nga nagakasyon sa Boracay.
Umpisa Hunyo 1 hasta 10 it makaron nga dag-on, nag-abot eon sa 66,215 ro numero it mga bisita ukon may daily average nga 6,621 kun sa siin mas maabu gihapon ro domestic tourists nga nakalista it 63,571.
Ro dumueuong nga bakasyunista ko Mayo hay nag-abot eon sa 4,268 ag 1,524 man makaron nga Hunyo.
Kaabuan kara hay naghalin sa United States, ginsundan it United Kingdom, Korea, Australia ag Canada.
