Nagapabilin ro posisyon it Alliance of Concerned Teachers Partylist nga dapat maghimo eon it pamaagi ag aksyon ro Department of Education angot sa andang apela nga ibalik sa dati ro school year.
Raya hay matapos nga bukon it suitable sa mga estudyante sa andang pagtinueon-an ro summer season.
Suno kay representative France Castro, mabuhay eon nanda nga ginaduso nga ibalik ro school year sa buean it Hunyo hasta it Marso.
Apang, ro padayon nga ginasabat it DepEd hay anda gihapon raya nga ginatun-an.
Buot hambaeon eamang sigon hay mahinay ro pagproseso sa sektor it edukasyon nga dapat hay raya ro maging prayoridad.
Ro main concern sigon nanda makaron hay ro tuman nga kainit it panyempo nga nagaresulta sa pagkalipong it pilang ka mga estudyante.
Ro ibang eskwelahan hay kueang sa mga electric fan ag punuan pa it mga estudyante.
Dapat suno kay Castro nga taw-an eon raya it igtaeopangod it DepEd para maibalik sa dati ro school year nga suitable para sa mga estudyante.
Samtang sa pihak nga parte, mabaskog makaron nga nagapanawagan ro nasambit nga grupo sa DepEd nga padasigon eon ro pagpasa it mga requirements agud nga mabuoe eon it mga manugturo ro andang performance based bunos ukon PBB.
Suno kay Castro, halin pa ko dag-on 2021 hay uwa gihapon nabaton it mga manugturo ro andang PBB.
