KALIBO, Aklan —- Padayun ro pagpabilin sa pwesto ni Malay acting Mayor Frolibar Bautista matapos ilampaso ro anang mga naka-engkwentru sa bag-o eamang natapos nga May 9 national and local elections.
Madumduman nga nagpungko bilang alkalde it Malay nga imaw ro may hurisdiksyon sa Isla it Boracay si Bautista matapos mapatalsik sa pwesto ro dating mayor nga si Ceciron Cawaling ko 2019.
Ginpierde kara sa botong 16,134 ro daywang kaengkwentru nga sanday Hector Casidsid nga nakabo-oe it 10,134 ag Marlyn Villaresis nga may 5,637.
Sa pihak nga parte, uman nga magapungko bilang vice mayor ro running mate nga si Niño Cawaling para sa ikaywang termino matapos pierdihon sa botong 19,053 ro anang naka-engkwentru nga si Abram Sualog nga nakabo-oe it 11,252.
Nasayuran nga pormal nga gin-endorso it gamhanan nga religious group nga Iglesia Ni Cristo ro kandidatura ni Bautista at Cawaling.
