Kalibo Aklan ———Nailista makarun sa Pilipinas ro ikaywa sa pinakamaabong kaso it COVID-19 sa single day tally umpisa ko nagtaliwan nga dag-on.
Raya hay matapos ireport makarun it Department of Health (DOH) ro nag-abot sa 17,447 nga mga bag-ong numero it kaso it COVID-19 sa nasyon.
Bangud kara, kabilugang COVID cases sa Pilipinas hay kapin sa 1,916,461.
Samtang maabo man ro mga bag-ong nagmayad nga kapin sa 6,771.
Sa kabilugan ro nakarekober maghalin sa virus hay kapin sa 1,741,089 eun.
Samtang, masobra man sa 100 ro mga panibag-ong namatay matapos nga kapin sa 113 ro bag-ong naidugang nga namatay.
Ro death toll sa nasyon hay kapin sa 32,841 eun.
Record breaking man ro kaabuon it mga aktibong kaso sa Pilipinas nga mas pang naglobo sa 142,531 ukon katumbas raya sa 7.4 percent.
Raya eun ro pinakamaabong mga pasyente umpisa ko Abril 17.
Samtang may una eamang nga sangka laboratoryo nga owa nakapagsumite it datos sa COVID-19 Document Repository System (CDRS).
Aminado man ro DOH nga sa mga masunod nga adlaw hay maabo pa sa gihapon ro nagsaka nga mga COVID cases sa nasyon mas kapin ag madasig magtapon ro Delta variant.
