Nag public apology pinaagi sa Bombo Radyo Kalibo si Adrian Cotoco it Quezon City kasunod sa nagviral nana nga tiktok video kon siin ginpaguwa kara nga may “mini outbreak” it covid-19 sa isla it Boracay.
Suno kana, gusto eamang nana nga taw-an it awareness ro anang viewers ag iba pang kilaea base man sa andang nasayuran nga balita maghalin sa andang ibang abyan nga nagpositibo sa virus paghalin sa bakasyon sa Boracay.
Aminado si Cotoco sa anang kasae-anan kon siin ro anang ginpaguwa nga mensahe hay uwa it opisyal nga statement maghalin sa lokal nga gobyerno it Malay ag gin-ako kara ro bilog nga responsibilidad sa anang ginhimo nga kasae-anan nga nagtuga it panic sa iba pang mga turista.
Madumduman nga ginbatikos si Cotoco bangud sa anang video kon siin insigida man nga nagpaguwa it abiso ro LGU Malay nga uwa it kamatuoran ro nakabaehag sa nasambit nga video.
Sa pinakaulihing datos nga ginpaguwa it Malay Health Office, daywa eamang ro positibo nga kaso it covid-19 sa nasambit nga banwa as of June 12, 2022.
