KALIBO, Aklan—Ginpadumdum it Department of Education ukon DepEd nga dapat nga maging simple eamang apang makahueugan ro mga pagapatigayunon nga graduation ag moving up ceremonies sa pagtapos it school year makaron nga Mayo.
Raya ro ginpahayag ni DepEd Region 6 spokesman Hernani Escullar Jr. sandig sa ginpaguwa nga sueundanan it ahensiya.
Suno kana nga ginabawae it DepEd ro pagkolekta it anumang kontribusyon ukon bayad para sa graduation ag moving up ceremonies.
Ginpahayag dugang nga ro mga non-academic project, kapareho it pagsunod sa field trips, film showing, junior-senior prom, ag iba pang school events hay indi man dapat nga gamiton bilang graduation ukon completion requirements.
Agud nga masiguro man ro kaeowasan ag proteksiyon it mga estudyante, manugturo ag iba pang magatambong sa graduation ag moving up, ro mga nasambit nga aktibidad hay dapat nga obrahon sa indoor venues, nga may nagakaigo nga bentilasyon ukon sa covered court agud nga indi mabuead sa grabeng init it tiempo.
Base sa DepEd Memorandum No. 023 nga ginpaguwa ko Mayo 2, gintaeana ro pagpatigayon it graduation ag moving up para sa mga estudyante sa Kindergarten, Grade 6, Grade 10, Grade 12, ag Alternative Learning System (ALS) umpisa Mayo 29 hasta 31.
Ro tema para sa pagtapos makaron nga school year 2023-2024 hay “Kabataang Pilipino Para sa Matatag na Kinabukasan ng Bagong Pilipinas.”
Suno kay Escullar nga ginataw-an kara it punto ro importanteng papel it edukasyon sa paghubog it pamatan-on nga Pilipino bilang mga pinuno sa pagbilog it sangka mas mabaskog ag mas progresibong nasyon.
