Matapos ro naunang ginfile nga daywang motion for reconsideration it Aeta community sa isla it Boracay ko Mayo 3 , nagapabilin sa makaron nga owa raya it sabat maghalin sa Department of Agrarian Reform ukon DAR region 6.
Raya ro ginpahayag ni Atty. Daniel Dinopol, legal counsel it mga katutubong Aeta.
Sa baylo sigon hay nakabaton ro mga raya ko Mayo 10 it panibag-ong tatlong bilog nga protesta it petitioners nga gin-grant it DAR.
Nasayuran nga ro tatlong nagprotesta hay puro mga land developer.
Rason nga suno kana hay nagdihon sanda it panibag-ong tatlong motion for reconsideration ko Mayo 25 bilang sabat sa nasambit nga mga panibag-ong protesta it mga petitioners.
Angot kara, magadihon man sanda it motion sa DAR 6 nga nagahinyo nga i-consolidate ukon I-tingob eon lang ro mga gindihon nga protesta it mga petitioners para indi man malisdan ro mga katutubong aeta it sinabat sa DAR regional office.
Suno pa kay Atty. Dinopol, ro porsyon it eogta nga napasaalima sa mga katutubong Aeta hay na-classify bilang alienable and disposable land.
Apang, igakwestyon nanda raya sa natungdan nga ahensya it gobyerno ro naging basehan sa pag-grant it protesta it mga petitioners kon sa siin ginapahayag nga bukon it suitable ro eogta pang agrikultura.
Apisar sigon nga bukon it suitable for rice and corn farming ro eogta hay sandig sa evaluation nga ginpatigayon it DENR, puweding magtanom it nagkaeain-eain nga root crops sa lugar kun siin raya hay nagaserbing ginapangabuhian it mga tumandok.
Angot kara, sa oras sigon nga madeny ro nasambit nga mga motion hay maga-apela sanda direkta sa national office it sekretaryo it Department of Agrarian Reform sa Manila.
Makasueubo nga kapin sa 44 nga miyembro it Aeta community sa isla it Boracay ro nagapameligro makaron nga mabawian it Certificate of Land Ownership bangud sa nasambit nga protesta it mga petitioners.
