KALIBO, Aklan—Matapos nga ma-okupa it Taliban forces ro haeos bilog nga siyudad it Kabul ag iba pa nga parte it Afghanistan, puro foreigners eon lang ro andang ginapahalin sa andang nasyon ag ginahawiran ro andang mga local nationals.
Apang ginpahayag ni Bombo International Correspondent Lorena Aurelio nga kaabuan sa mga pumueuyu idtu hay naga-pwersa man nga makaguwa it andang nasyon bangud sa kahadlok.
Nasanay ag naka-adopt eon sigon ro mga Afghans sa kultura it mga foreign nationals kapareho it mga Amerikano kamana man ro kahilwayan ag kinamatarung nga andang gina angkon.
Kaabuan kanda hay owa naila nga uman nga magpaidaeum sa Shariya Law nga ginasunod it mga Taliban militants nga makabig nga mapintas.
Sa makaron hay gin pull out eon sa mga supermarkets maskin ro mga beauty products kamana man nga ginpinturahan ro litrato it mga babaye nga nakapaskil sa guwa it mga beauty salons sa Kabul.
Nasayuran nga matapos ro ulihing pagdumaea it Taliban sa nasambit nga nasyon, bawae ro mga babaye nga magtrabaho ag mag-agto sa eskwelahan.
Kinahangean man nga pirmeng may tabon ro andang itsura rason nga kaabuan sa mga babaye idtu hay uman eon man nga nagabakae it burqas.
Gindugang pa ni Aurelio nga matapos nga ma-control it Taliban ro presidential palace naging delikado eon ro sitwasyun bangud nga nagkalhit sa mga karsada ro andang pwersa.
