KALIBO, Aklan—Gindaea sa unang kahigayunan sa isla it Boracay ro dag-unan nga Agri-Aqua Trade Fair sa pagpanguna it Office of the Provincial Agriculture (OPA) bilang kaparte it nagahilapit nga selebrasyon it Aklan Day.
Ro Agri-Aqua Trade Fair hay masaming ginahathat sa capitol ground apang bangud sa katuyuan nga maibaligya ag maipakilaea ro mga lokal nga produkto it mga Aklanon hay gindesisyunan nga idto raya idisplay sa isla it Boracay.
Tuyo kara nga bukon eamang it sa mga hotels and restaurants sa isla igapresenter kundi maging sa mga domestic and international tourist ro mga nagkaeain-eain nga produkto nga makit-an sa bilog nga probinsya it Aklan.
Ro 2024 Aklan Agri-Aqua Trade Fair sa Boracay hay may temang: “Honoring the Past, Shaping the Future: From the Seeds Sown to Strength Grown: 68 Years of Progress for a Thriving Aklan” kon sa siin ginakaeakipan raya it 26 booths maghalin sa 17 ka mga kabanwahanan sa bilog nga probinsya it Aklan.
Makit-an nga ro mga exhibitors hay maghalin sa private sectors ag national government agencies nga nakalinyada sa main entrance mismo it D’Mall sa may bahin it Laketown, Brgy. Balabag sa nasambit nga isla.
Ro trade fair hay nag-umpisa ko Abril 12 ag magatapos makaron nga adlaw it Dominggo, Abril 14 2024.//
