Magalunsar ro Department of Agriculture (DA) it Optimization and Resiliency in the Onion Industry Network (ORION) program para mabuligan ro industriya it sibuyas sa nasyon nga mapa-umwad pa ro andang produksiyon nga magaresulta sa mas maabu nga suplay it produktong pang-agrikultura sa nasyon.
Suno sa DA ro programa hay nabilog sa ginpatigayon nga pagpueong kaibahan ro stakeholders kapareho it onion growers, traders ag importers matapos nga talakayon ro produksiyon it sibuyas sa nasyon nga owa naaabot ro 260,000 metrikong tonelada nga dag-onang demand.
Tuyo it nasambit nga programa nga makaangkon it sangka de-kalidad, euwas, barato ag padayon nga suplay it sibuyas para masabat ro nagatinaas nga domestic demand.
Pila sa mga stratehiya ag programa nga igapatuman hay ro pagtao it madaling access sa credit loans para sa pagbabakae it mga equipment ag pagpatindog it mga establishimento.
Sandig sa datos maghalin sa DA, may kabilugang 283,172 MT puea ag dueaw nga sibuyas ag bawang ro naani ko 2022.
Kapin sa 35% mat-a ro owa napanipusean matapos ro anihan bangud sa kakueangan it pasilidad kapareho it cold storage ag bukon it maayos nga pagdumaea kung siin ko 2022 eamang nakalista ro DA it 100,000 MT losses.
