KALIBO, Aklan — Nagapadayon ro pag-usisa it Department of Environment and Natural Resources (DENR) ag Mines and Geosciences Bureau (MGB) sa frontbeach sa isla it Boracay para sa iba pang posibleng outfall pipes nga ginaturong rason it polusyon sa baybayon it isla.
Ginkumpirma ni Atty. Richard Favila it Community Environment and Natural Resources (CENRO)-Boracay nga pilang mga negosyante ag residente sa isla hay pa-sekretong nagakakas it mga tubo kada tungang gabi-e agud makalikaw sa multa ag kaso.
Nauna eon nga gin-insister ni DENR Secretary Roy Cimatu nga uwa kara ginarekomenda ro uman nga pagbukas sa Boracay sa mga turista hasta nagapabiling mahigko ro tubi ag uwa nagasunod ro mga negosyante sa sueondanan.
Sa bulig it Ground Penetrating Radar it MGB, pilang mga tubo, septic tanks ag drainage ro nadiskubreng nagapaguwa it mahigko nga tubi.
Base sa Municipal Order No. 307 it Malay, Aklan, ro mga maeagkong hotels ag resorts nga may 50 rooms capacity hay obligadong makaangkon it kaugalingong treatment plant ag ginapasugtang magpaguwa it wastewater nga pasado sa gintaeanang standard.
Samtang ro mga may-unang 49 rooms capacity panaba hay mahimong makaangkon it cluster sewerage treatment plants sa mga kaeapit nga establishimento.
