HEALTH News —- Nagtau it tips ukon padumdum sa publiko ro mga eksperto agud nga malikawan ro heat stroke makaron nga tag-init.
Suno sa mga eksperto, kon ro heat index hay umabot sa 27° celsius hasta 32°c hay posibleng makaexperiensiya it fatigue ag heat cramp ro sangka tawo samtang ro heat index man nga kapin sa 32°c hasta 41°c hay pwede man nga maging rason it heat stroke.
Mayad nga magsuksok it mga light colored ukon bukon it makutom nga kulay it eambong kun magaguwa it baeay bangud nga mas mataas ro tiyansa kara nga maka-absorb it init halin sa adlaw .
Pirme man sigon nga maggamit it payong bilang panagang sa grabeng init it adlaw; mag-inom it maabu nga tubi; ag likawan nga magbuead sa init it adlaw agud nga malikawan ro heat stroke.
Engkaso man nga makabatyag it pagbuyog it ueo, pagsuka, madasig nga pagpitik it tagipusuon, ag kabudlay sa pagginhawa, mayad nga insigidang magpangayo it bulig sa natungdan agud nga eagi man nga mataw-an it atensyong medikal.
