KALIBO, Aklan—Ginpaiway anay it Aklan National High School for Arts and Trades ukon AHNSAT ro pagpatigayon it full implementation it face-to-face classes umpisa Nobyembre 2 bangud sa kakueangan it classrooms.
Raya hay sa pihak it mandu it Department of Education ukon DepEd.
Suno kay Richard Flores, Principal 1 it AHNSAT nga makaron nga school year hay nakalista sanda it 58 nga sections umpisa Grade 7 hasta Grade 12, apang may una eamang sanda nga 37 nga classrooms nga available.
Mag-eowas kara, imbes nga 40 nga estudyante ro “ideal” sa sangka classroom hay naga-average sanda it 50, kun sa siin raya hay sobra it napueo.
Gindugang pa ni Flores nga owa sanda it choice kundi nga i-adopt ro shifting of classes.
Gintunga sigon nanda ro masobra sa 2,700 nga learners sa daywang shift kun sa siin tatlong grade level ro nagaklase sa kada shift.
Ro tatlong adlaw hay gintaeana sa face to face classes ag ro daywang adlaw hay modular.
Samtang, ginpahayag ni Flores nga gin aprubahan it DepEd-Aklan ro andang request nga ma-exempt sa full implementation it face to face classes umpisa Lunes hasta Biyernes bangud nga maskin sanda hay aminado nga indi madali-dali ro problema sa kakueangan it classrooms.
Maskin may allocation pa sigon ro national government para sa construction, apang problema man nanda ro lugar nga pagapatindugan it building.
Nagakinahangean man sigon nga maghueat it 25 anyos antes nga ma-demolish ro sangka naga-eksister nga building ukon bag-uhon ro anang structure agud nga maging daywa ukon tatlong grado nga building.
