Gin-anunsyo it Department of Social Welfare and Development (DSWD) nga pwede eon nga makapanipueos ro tanan nga indibidwal sa programang Assistance to Individuals in Crisis Situations ukon AICS.
Suno kay DSWD Crisis Intervention Program Director Edwin Morata, uwa it ginapili nga lebel it pagpangabuhi ro epekto it mga kalamidad ag emerhensya kaya ginpaeawig ro sakop it programa para mabuligan ro nagkaeain-eain nga sektor.
Ginpadali eon man it DSWD ro proseso it aplikasyon kun siin maga-agi eon lang ro mga aplikante sa pagpila, assessment ag interview antes mabuoe ro bulig pinansiyal.
Nagpaandam man ro ahensiya kontra sa paggamit it fixer ag pagsumite it pekeng dokumento matapos mapasakaan it kaso ro pilang indibidwal nga pauman-uman sigon nga nag-claim it ayuda gamit ro nagkaeain-eain nga pagkatawo.
Kaibahan sa pwedeng mabuoe nga ayuda sa idaeom it AICS ro medical, burial, transportation, educational, food ag iba pang financial assistance.
